屎窟痕去咗海洋公園玩，好熱！
想飲鑵汽水解吓渴？
擺低十五大圓先啦！癲~！
話晒回歸十週年，務必去探一探四隻國寶，
可惜國寶們只顧住瞓，郁都唔郁，
但係成班火星人好似發現新大陸一樣（包括在下），
搏晒老命舉起自己嘅相機喺限時兩分鐘之內係咁影係咁影係咁影係咁影.........
唔知邊隻係盈盈，邊隻係樂樂，你分唔分到？分到話過我知啦喂，唔該！
呢隻係安安，瞓得幾招積，睬你都有味！
你睇唔睇到佳佳喺邊呢？
另外，
本人發現海洋公園有一新遊戲因為本人唔知該項遊戲嘅真實名稱，
所以我就暫時叫佢做.......＜戚袋袋＞
有請表叔示範.......
唔知係咪戚袋袋遊戲太激烈，定係天氣太熱，焗得滯要唞唞氣嘅關係，
喺表叔彈吓彈吓之際，唔覺意走咗隻指公出嚟！
係我事後睇play back時發現的，笑爆！
全日嘅收穫係.......
玩咗一次好耐冇玩嘅過山車，
玩咗一次都幾好玩嘅越礦飛車，
睇咗鯊魚，去埋海洋館，撇~！
臨尾等車時仲見到熱氣球緩緩升空，
望住個熱氣球，慨歎著動感影院已變成機舖，
唔知點解？海洋公園好似經已冇以前咁好玩咯！
好懷念以前成班o靚仔o靚妹一齊去水上樂園，
五彩天梯，開心河，浪濤灣，激流旅程.......真係好好玩！
No comments:
Post a Comment