大革新？

Fashion & Beauty大革新，
由呢個范曉萱封面已經睇得出啦！

P.S.喂~老總，好似淨係得個封面變得多啲啫啵！

paper work !

又到月尾，又係文書處理工作嘅時候，
一連串煩厭嘅paper work又嚟喇！
車費，petty cash，更表，假期上班申報表，假期申報表..........
so many表要填，一填就十幾份，真係要做幾日㗎，陰公~！

我相信，十個攝影師，九個都討厭paper work！
我就係其中嘅1/9個喇！

喜喜返屋企咯！

喜喜今晚終於返屋企喇！
希望佢日後會健健康康啦！
睇佢瞓得幾冧！

沒有喜喜的週末！

第一個喜喜唔喺屋企過嘅週末，我成家人都冇晒心機，
過咗一個好靜好靜嘅weekend，就連財財同發仔都擔心喜喜擔心到冇乜心機玩，終日悶悶不樂，
佢哋嘅眼神好似問緊我喜喜幾時返嚟咁！
唉~！喜喜真係命苦！今日見到佢冇晒精神咁，
真係好想喊！真係心痛死我囉！喜喜，你快啲好番呀！
我哋一家五口要整整齊齊平平安安呀，知嘛？

心痛死！

今朝一早動物醫院打嚟話喜喜要做手術，
嚇得我即刻飛奔落去睇佢，簽晒紙做手術，
５，６點再返去睇吓佢，原來又唔洗開刀，嚇鬼死！
但見佢吊晒鹽水，插咗條尿管，等佢聽日拆咗尿管後，
觀察吓痾唔痾到尿，順利的話就返得屋企，真係淒涼！
總算係大步檻過！但見佢插晒喉咁真係好鬼心痛！
簡直想喊！

可憐的帶喜！

我家帶喜被驗出尿道有晶石，痾唔到尿，
需要留院觀察，今日我帶佢睇完醫生真係好想喊！
可憐嘅喜喜只得歲半，點解要咁唔好彩？
佢係喺一個好差好差好差好西好西好西嘅人屋企誕生，
我第一次見帶喜佢一身都係癬，好瘦好瘦，
呢個西主人仲教我用隻腳踩住隻貓條頸嚟幫佢哋剪指甲，
oh my god！簡直係痴線！佢根本無視小動物嘅生命！
所以我帶咗帶喜離開呢個地獄同魔鬼！
喜喜被我養得肥肥白白，活活潑潑，一直都相安無事，
點知今日又尿道有晶石，點解一隻咁可愛嘅小貓咪要受咁多苦？
希望喜喜早日康復！健健康康！惡運從此離佢而去啦！

如意袋？

上個月我大廈立案法團出咗張通告，
內容係........
近日發現心理變態者/狂徒，從本廈高層擲下，
計有糞便，如意袋，衛生巾等物品.......（下刪數十字）
自己睇啦！（請原諒張相有啲手震）
哈~！哈~！真係乜人都有！

食咗屎！

啱啱過咗嗰個星期日，去康怡吉之島買吓家品，
肚餓就去咗唔記得三樓定二樓呢間餐廳食嘢，
呢間嘢叫chalon，完全零服務，食物又特別，
我食咗個滑蛋豬扒定食，好鹹！真係除咗鹹之外，都冇其他味道食到！
上圖中乃係一個唔知咩海鮮意粉，簡直不之所謂！
墨魚硬到咬唔開，啲蝦超霉同冇味，帶子有陣膠味，同食擦膠冇兩樣，
總之就.....食咗屎啦呢次！

P.S. 若果有大膽之仕想試吓食屎嘅知味的話........，歡迎大駕光臨！

國產主義者 - 實而不華！

呢隻名叫U2嘅outdoor燈乃係我國嘅產品，售價只係HK$1,500.00大圓，
有300W嘅power，full power輸出時回電只需３至４秒，
叉足一次電後能夠達到１千次或以上嘅閃光輸出！
雖然個樣確係騎呢，無啦啦加咗個鎗柄落去，
相信佢嘅design係來自叮噹嘅變大縮細鎗！
但係我眞係睇過晒所有外國大牌子嘅外影閃燈，
回電快嘅，要３至４萬蚊，平啲嘅，回電又慢，要５至７秒，
而且通通都係叉一次電只能夠有二百至四百次嘅閃光輸出，
外國嘅所謂大牌子完全冇一隻有佢咁平咁耐用，不得不能讚嘆我國嘅細心同偉大，
呢啲就叫做實而不華，外表唔等於一切，個樣唔靚仔唔代表佢唔好，
做人亦一樣，希望那些討厭嘅香港人唔好再以外表嚟睇人！

不請自來的客人

之前自來的貓終於露出真面目，
你睇佢喺我個露台度行catwalk幾招積！
不過眞係瘦咗啲囉，陰公！

榮休！

陪伴咗我５年之耐嘅3650，終告榮休，從此免受一日hang幾次機之苦！
換上係好薄好薄嘅6300，唔知佢又會陪到我幾耐呢？
咪埋眼都可以打中文sms嘅手指公，從今起要從新適認過喇！